کیف (جیوڈیسک) یوکرین کے رکن پارلیمنٹ اور سابق وزیر کو ان کی پریس کانفرنس سے چند لمحے قبل مخالفین نے مار مار کر زخمی کر دیا جس کے نتیجے مین وہ پریس کانفرنس تو نہ کر سکے لیکن اسپتال جاپہنچے۔
یوکرین کی وزارت داخلہ کے مطابق اوڈیسا میں سابق یوکرینی صدر وکٹر یوکووچ کی پارٹی کے رہنما اور رکن پارلیمنٹ نیسٹر شوفرچ پریس کانفرنس کرنے جارہے تھے کہ وہاں موجود دائیں بازو کی جماعت کے 100 سے زائد حامیوں نے ان کی پٹائی شروع کردی۔
نیسٹر کے ساتھ موجود محافظوں نے ہوائی فائرنگ کر کے حملہ آوروں کو بھگانے کی کوشش کی لیکن وہ اس میں ناکام رہے، غصے میں بھرے ان افراد نے رکن پارلیمنٹ پر مکوں اور لاتوں کی بارش کر کے انہیں لہولہان کردیا۔
نیسٹر شوفرچ کا کہنا تھا کہ حملہ طے شدہ منصوبے کے تحت کیا گیا اور مخالفین کی دلی خواہش تھی کہ وہ بھی انہیں کچرا دان میں ڈال دیں لیکن وہ ان کی زندگی میں اس طرح کے ہتھکنڈوں میں کامیاب نہیں ہو سکتے۔
انہوں نے کہا کہ وہ دوبارہ اوڈیسا آئیں گے اوراس طرح کی لاقانونیت ختم کر کے شہرکوان شیطانوں سے پاک کروائیں گے۔ واضح رہے کہ گزشتہ ماہ بھی لوگوں نے ایک رکن پارلیمنٹ کو عوام مخالف بل کی حمایت کرنے پر کچرا دان میں ڈال دیا تھا۔
کام ہوتا رہے گا،پہلے تھوڑا ڈانس تو کرلیں
ہانگ کانگ میں ’غیر قانونی‘ احتجاج پر چین کی وارننگ
