لاہور (اصل میڈیا ڈیسک) پاکستان مسلم لیگ (ن) کی مرکزی نائب صدر مریم نواز نے قومی اسمبلی کے حلقہ این اے 75 ڈسکہ کے ضمنی انتخاب میں کامیابی پر ردعمل کا اظہار کیا ہے۔
اپنی ٹوئٹ میں مریم نواز نے کہا کہ ’شاباش ڈسکہ، شاباش ڈسکہ کے غیور اور بہادر عوام، شاباش نوشین‘، تم نے آج ایک بار پھر’ووٹ کو عزت دو‘ کی جنگ جیتی۔
انہوں نے کہا کہ دنیا پر واضح ہوا کس طرح 19 فروری کو کٹھ پتلی وزیراعظم کی نگرانی میں ووٹ کی عزت پر ڈاکا ڈالنے کی کوشش کی گئی، نواز شریف کا بیانیہ جیت گیا، جب بھی منصفانہ الیکشن ہوں گے، جیت شیرکی ہی ہو گی۔
مریم نواز کا کہنا تھاکہ نواز شریف کی سیاست ختم کرنے والے یاد رکھیں نواز شریف ایک نظریےکا نام ہے، نوازشریف کا نظریہ عوام کے دلوں میں گھر کر چکا ہے، اس جعلی حکومت کے دن گنے جاچکے، وہ دن دور نہیں جب اس ملک میں عوام کی حکمرانی ہوگی، جعلسازوں کی نہیں۔
ان کا کہنا تھاکہ سن لو عوام کیا کہہ رہے ہیں، غربت، مہنگائی اور بیروزگاری کے ستائےعوام سے تمہیں کوئی نہیں بچا سکتا، اپنے انجام سے ڈرو۔
مریم نے مزید کہا کہ جہاں جہاں ووٹ پڑے گا وہاں نوازشریف جیتے گا، شیر دھاڑے گا، عوام نے فیصلہ کرلیا ہے، اب ووٹ چوروں کا ڈٹ کر مقابلہ کریں گے۔
خیال رہے کہ پنجاب سے قومی اسمبلی کے حلقے این اے 75 ڈسکہ کے ضمنی الیکشن میں مسلم لیگ (ن) کی امیدوار نوشین افتخار نے میدان مارلیا۔
این اے 75 کے تمام 360 پولنگ اسٹیشنز کے غیرسرکاری اور غیر حتمی نتائج کے مطابق ن لیگ کی نوشین افتخار ایک لاکھ 10ہزار 75 ووٹ لےکرکامیاب قرار پائیں جبکہ پی ٹی آئی کے علی اسجدملہی 93ہزار 433 ووٹ لے کر دوسرے نمبر پر رہے۔
یوں نوشین افتخار نے 16 ہزار 642 ووٹوں کی سبقت حاصل کی۔
غیرحتمی و غیرسرکاری نتائج کے مطابق تحریک لبیک پاکستان کے خلیل سندھو 8268 ووٹ لیکر تیسرے نمبر پر رہے۔
کورونا: پاکستان کیلئے 2021 کا سب سے خطرناک دن، 114 اموات ریکارڈ
ڈسکہ الیکشن میں عوام جیت گئی، ووٹ چور سلیکٹڈ مافیا ہار گیا: حمزہ شہباز
