دبئی (جیوڈیسک) پاکستان کرکٹ ٹیم کے کپتان مصباح الحق کا کہنا ہے کہ کل سے شروع ہونے والے دبئی ٹیسٹ میں بھی قومی ٹیم جیت کے جذبے کے ساتھ میدان میں اترے گی، دبئی ٹیسٹ سے قبل پاکستانی کھلاڑیوں نے بھرپور پریکٹس کی، بیٹنگ بولنگ اور فیلڈنگ، تینوں شعبوں میں بہتری کے لئے نیٹ کا رخ کیا۔
پہلے ٹیسٹ کے بعد مشکوک بالنگ ایکشن کی وجہ سے رپورٹ ہونے والے محمد حفیظ نے بھی نیٹ پر بالنگ کی لیکن ہیم اسٹرنگ انجری کی وجہ سے انکی فائنل الیون میں شرکت کا امکان کم ہے۔ ہیڈ کوچ وقار یونس اور مینجمنٹ کے دیگر افراد نے وکٹ کا جائزہ لیا۔ بعد میں میڈیا سے بات کرتے ہوئے کپتان مصباح الحق نے کہا کہ ٹیم کا مورال بلند ہے، جیت کے سلسلے کو جاری رکھنے کی کوشش کریں گے۔
