یمن (اصل میڈیا ڈیسک) سعودی عرب اور متحدہ عرب امارات نے یمن میں حوثی باغیوں کے خلاف اپنی مشترکہ عسکری کارروائیاں جاری رکھنے کا اعلان کیا ہے۔ قبل ازیں اختلافات پیدا ہونے کی وجہ سے یو اے ای نے یمن سے اپنے فوجیوں کو واپس بلا لیا تھا۔
یمن میں متحدہ عرب امارات کے حمایت یافتہ باغیوں اور حکومتی فورسز کے مابین اندرونی لڑائی کی وجہ سے متحدہ عرب امارات نے اپنے فوجیوں کی ایک بڑی تعداد یمن سے واپس بلا لی تھی۔ اس اندرونی لڑائی کی وجہ سے سعودی حکومت اور اس کے ساتھ مل کر حوثی باغیوں کے خلاف لڑنے والے اتحادی ملک متحدہ عرب امارات میں بھی دراڑیں پیدا ہو گئی تھیں۔ لیکن آج جاری ہونے والے ایک مشترکہ اعلان کے مطابق دونوں ممالک یمن میں اپنی سیاسی، فوجی اور امدادی سرگرمیاں جاری رکھیں گے۔
اس بیان میں متحدہ عرب امارات کو بدنام کرنے کی ایک مبینہ سازش کو بھی مسترد کر دیا گیا ہے۔ دونوں حلیف ممالک کی جانب سے یہ بیان ایک ایسے وقت میں جاری کیا گیا ہے، جب ریاض حکومت نے ایرانی حمایت یافتہ حوثی باغیوں کے کم از کم چھ بیلیسٹک میزائل اور دو ڈرون حملے ناکام بنائے ہیں۔ دوسری جانب ان دونوں ممالک پر اس وجہ سے بھی دباؤ بڑھتا جا رہا تھا کہ دانشور آن لائن پلیٹ فارمز استعمال کرتے ہوئے ان حلیف ملکوں کے بڑھتے ہوئے اندرونی اختلافات کو شدید تنقید کا نشانہ بنا رہے تھے۔
جون میں متحدہ عرب امارات نے اپنے فوجیوں کی ایک بڑی تعداد کو یمن کے محاذ سے واپس بلا لیا تھا۔ یو اے ای حکام کی جانب سے ابھی تک یہ واضح نہیں کیا گیا کہ کتنے فوجی یمن سے واپس بلائے گئے تھے؟ لیکن یمنی حکام کے مطابق دس ہزار میں سے پچھہتر فیصد اماراتی فوجیوں کو واپس بلا لیا گیا تھا۔ اماراتی فورسز یمن میں فرنٹ لائن کارروائیوں میں شریک نہیں ہیں لیکن وہاں مقامی جنگجوؤں کی تشکیل کے ساتھ ساتھ خفیہ آپریشنز کی نگرانی کر رہی ہیں۔
حالیہ کچھ عرصے سے ان کے حمایت یافتہ جنگجو اس قدر طاقتور بن کر ابھرے ہیں کہ انہوں نے ملک کے جنوب میں بین الاقوامی سطح پر منظور شدہ یمنی حکومت، جسے سعودی حمایت بھی حاصل ہے، کے خلاف کارروائیاں شروع کر دی تھیں اور عدن شہر پر بھی قبضہ کر لیا تھا۔ اس طرح ایرانی حمایت یافتہ حوثی باغیوں کے خلاف لڑنے کی بجائے ان کی آپس میں لڑائی شروع ہو گئی تھی۔
سعودی عرب اور متحدہ عرب امارات کے مابین ‘اختلافات ختم‘ ہونے کے بعد آج ان دونوں ملکوں نے جنوب میں اپنے متحارب فریقین سے جنگ بندی کی اپیل کی ہے۔ قبل ازیں سعودی حمایت یافتہ اور بین الاقوامی سطح پر منظور شدہ یمنی حکومت نے کہا تھا کہ وہ اس وقت تک مذاکرات نہیں کرے گی، جب تک متحدہ عرب امارات کے حمایت یافتی باغی عدن پر اپنا قبضہ ختم نہیں کرتے۔ بین الاقوامی سطح پر منظور شدہ یمنی حکومت نے یو اے ای پر واضح تنقید کرتے کہا تھا کہ وہ ایسا کرنے میں باغیوں کی حمایت کر رہی ہے۔
یمن کی پانچ سالہ جنگ میں اب تک تقریباﹰ 94 ہزار انسان مارے جا چکے ہیں۔
برطانوی اخبار اور شہباز شریف کے وکلا مصالحت میں ناکام، مقدمہ عدالت میں چلے گا
پاک بھارت مسائل دو طرفہ ہیں، مودی نے کشمیر پر ٹرمپ کی ثالثی پھر مسترد کر دی
