دل سوز سے خالی ہے ، نگاہ پاک نہیں ہے
Posted on July 13, 2012 By Adeel Webmaster علامہ محمد اقبال
nigah
دل سوز سے خالی ہے ، نگاہ پاک نہیں ہے
پھر اس میں عجب کیا کہ تو بے باک نہیں ہے
ہے ذوق تجلی بھی اسی خاک میں پنہاں
غافل! تو نرا صاحب ادراک نہیں ہے
وہ آنکھ کہ ہے سرمۂ افرنگ سے روشن
پرکار و سخن ساز ہے ، نم ناک نہیں ہے
کیا صوفی و ملا کو خبر میرے جنوں کی
ان کا سر دامن بھی ابھی چاک نہیں ہے
کب تک رہے محکومی انجم میں مری خاک
یا میں نہیں ، یا گردش افلاک نہیں ہے
بجلی ہوں ، نظر کوہ و بیاباں پہ ہے مری
میرے لیے شایاں خس و خاشاک نہیں ہے
عالم ہے فقط مومن جاں باز کی میراث
مومن نہیں جو صاحب لولاک نہیں ہے!
علامہ محمد اقبال
میر سپاہ ناسزا ، لشکریاں شکستہ صف
تجھے یاد کیا نہیں ہے مرے دل کا وہ زمانہ
